Inkhawm tur chuan hmanhmawh tak maiin ka insiam a, zan lama ka lo menrei deuh avangin ka tlai lek lek tawh nghe nghe a. Biak in lamah kan hla hruai thla te a nih avangin tlai taka kal a mawi silova, chuvangin chaw pawh ei mumal hmanlovin ka chhuak ani a. Kan inkhawm kalkawng hi a thui em em lehnghala, rel(local train) pawhin darkar 1 vel lai kal a ni.
Auto rickshaw ka la a, train station lam pan chuan ka chhuak ta a. Station ka han thlen chuan ticket cut tur hi anlo in line sei em em lehnghala, rilru hmanhmawh nen dawhtheih a ngai kher mai. Minute 20 dawn ka inline hnu chuan ticket chu ka chang ve hram a, tichuan rel lo tlan chu nghakin rang taka zuang lut turin ka lo inpeih sa ap a, a dinrei ngailoh avangin luh hmanloh pawh thil awm thei a ni.
Rel chu a rawn tut phei vuah vuah a, hmuh phak chin aṭangin a tawt thawkhat hle a ni tih hriat theihin a kawngkhar ah hian anlo inhnawh phei tût mai lehnghal a. A rawn din fel tak tak hma chuan lawn kan inchuh a, lut hmanlo nih kan hlau ṭheuh lehnghala.
Vanneih a siamin a inhnawhlut hmasa ah ka ṭang ta hlauh a, chu mai piahlamah pa pakhat hian a ṭhutna alo thawhsan lai tak a nih avangin a seat ruak chu ka chuh ta vat a. Rel chhung chu boruak a ipik in khua a lum bawk si a, lu pawh a hai rum rum thei hial a ni.
Ka thlenna tur ala hlat em avangin chhuk leh hmanhmawhna thinlung ka nei lem hrihlo bawk a, ka ṭhu chu khabe dawmin ka maimitchhing ta vang vang a. Ka muthlu zui ta a, ka han harh chhuah chuan kan lo thleng der a, mihring tumah anlo chuang tawhlo a. Boruak lah chu a nuamin thlifim thaw te chuan min rawn chhem heuh heuha, rel aṭang chuan ka han chhuak a, khawlai te chu alo faiin a thiang kuk maia.
Mahse mipui tumah anlo awm tawh lo a, ka ngaih a ṭhalo khawp maia, ka hmalamah chuan ka han kal hreta ka awmna aṭanga meter 30 vela hla ah hian gate lianpui mai hi a lo awm a. Ka va pan hnaia, gate vengtu hmai fai tak mai hi alo ding a, “Khawiah nge i kal dawn” tiin minlo zawta, keichuan “Ruatfela ka nia mipui tumah ka hmu ta silova, ka chhukna hi a diklo em ni?” ka ti a.
Ani chuan nuisang in “E, Ruatfela maw…ka pu in ilo kaldawn thu a sawi alawm, lo lut teh” a ti a, mak ka ti khawp maia. “Saw laia building rawng var leh pawl inpawlh saw i hmu em, tahsawn a lo nghak reng che nia. Hei hian va kal rawh” a tihpah chuan sakawr var chu min pe a.
Chu building chu a bulhnai ka thlen meuh chuan rala ka en ang aiin alo lian hrep lehnghala, kawngkhar vengtu pahnih chuan nuisangin kawng minlo hawn a. Inchhung ka han lut chu ka mengphawk hra nghal a, chutiang em em a in ropui leh changkang ah chuan vawikhatmah ka la lut lova TV ah pawh ka la hmu ngai hek lo.
Mak ka la tih leh em em chu, inchhunga hnathawk, hmel fai leh smart tak tak te chuan kun chungin nui sang in chibai minlo buk zel a. An chaw ei dawhkan lah chu a han sei em em lehnghal a, chumi khat vek chuan ei tur leh thei tuihnai tak tak te chu ala in tlar pût lehnghal a. He inchhunga cheng hi an tam hle dawn a nih hi ka ti rilru sap sap a.
Min hruai chhan chu a ngaihna ka hriatloh em avangin an zinga pakhat hnenah chuan, “Engatinge hetah hian min hruai?” ka ti a, a ni chuan hawihawm takin, “Ka pu, kan pu in a hmu duh che, alo thleng thuai ang. Alo kal hma i duh duh hi lo ei la, puar takin awm rawh” min ti a.
Thei tui tak mai kala ei ngailoh ka luh tirha ka mit la em em mai chu ei ka dil a, a ni chuan thlengin tam tak min rawn chhawp a. Ka ei zawh chuan ka kut silna tur leh kam ṭhuahna tur te chu min rawn pe bawk a. “Huan ah sawn va kal rawh, chutah chuan kan pu chu alo thleng thuai dawn e” a ti a, huan lamah chuan ka chhuak ta a.
Ka han hawikuala, pangpar mawi tak tak leh thingkung mawi tak tak te, dil khuah sangha hlim taka an infiam lai lo lim chhuak zawr zawr te, sava hram mawi tak tak te chuan ka mit an ti tlai hle mai. Huana ṭhutna lo awm nuam takah chuan ka han ṭhu a, an pu lokal tur an tih chu ka lo nghak a.
Ka rin aiin a rei angreng phiana, ka hma lawka huan nghaktu niawm tak putar lokal chu ka lo hui a. Ka kiang alo thlen chuan “Ka pu hetah hian lo ṭhu ve hrih rawh i hah tawh awm si” ka ti a, a ni chuan “Hah love, he in leh a vel hi fai takin rei tak ka lo enkawl tawha chei na tur bungrua a awm hi chuan nuam ka ti ṭhin asin” a ti a, “Ka pu chu i taima hle mai a, ka fak khawp maiche. Huan enkawl lawmman te hi i nei ve em?” ka ti a, a ni chuan “In leh a vel cheina tur lo thleng apiang ka hmuh hian hna thawh tur ka neia, chu chu ka lawmman hmuhna chu a nimai” a ti a.
Ka khawngaih viau dawna amah chu a hlim hmel em em mai bawk si a, sawi tur ka van zui angreng khawp maia. “Ka pu kan la inchibai hleinem” ka tih pahin kan han inchibai a, a kut pawh alo thap hrup maia. Ka han enchianga alo kaw rul maia, a ke lam ka han en leh chuan a kephah pawh chu a lo kaw rul mai bawk a.
A hmel ka han en chian leh chuan a chala hlinglukhum khumna thla te chu ka hmu a, a hma ah ka bawk khup a “LALPA min ngaidam rawh, misual ka nih hi” ka ti a. “Fela, i sual thu sawi turin hetah hian ka ko hleinem che, heng zawng zawng i inleh lawmman te hi pe tur che in alawm ka koh che” a ti a. “LALPA heng zawng zawng hi ka ta a ni thei ang maw! Kei tilungngai ṭhintu che hian ka phu lul love” ka ti a, a ni chuan “Khawvela i awm chhung zawng khang heng zawng zawng te hi i awt ve dawn a ni tih ka hre reng a, mahse keimah min phatsan aia i hnar tak te kha hetah hian a aia ṭha zawkin ka lo sak sak zel che alawm."
"Hengte hi nangma khawlkhawm aṭanga ka lo sak zel kha a ni a, i ta liau liau a ni. A chhunga awm zawng zawngte pawh khi i rawngbawl tute ni tura rinawm taka i in lo enkawl tute an nih khi. Han haw la hlim takin chawl hahdam rawh” a ti a.
Mak ka ti a, sawi ngaihna ka hre silo, ka biangah chuan mittui alo luanga min rawn kuaha, “Isu i ta ka ni, ka hmangaih a che. Thildang zawng aipawhin ka hmangaih zawk che” ka ti a.
In lamah chuan min hruai chhoa, inchhung ami te chuan hlim takin minlo lawma kut an benga, rimawi tinreng tumin an lam dur dur mai bawk a, keipawh chu ka lam vea nuam ka ti em em a. Kan lam zawh chuan ka room lamah chuan khum nuam takah hian min mut tir a.
Reilo te ka muhil hman tih ah chuan Isua chuan ka mal chungah a rawn sawi a, “Fela, tho rawh, tho rawh, i unau ten an mamawh che” a ti a. Ka han harh chhuah chuan kutdawh naupang te hian inthlahrung takin ka khup ah hian min lo sawi a, pawisa min lo dil a.
Ka han hawikuala rel ah ka lo la chuang reng hi alo ni a, nui sang chungin ka pawisa neichhun tlemte chu ka phawrh a lawm takin ka pe ta a. Ka chhukna tur station pawh ka lo thleng hnai tawh hle hi alo ni a. Biak in lam pan chuan hlim takin ka kal ta a.
“...vanah, sulrul leh tuiekin a ei chhiat lohnaah, rukruten an reh pawha an ruk hek lohnaah chuan, in tan rote khawl khawm zawk rawh u; i ro awmna apiangah i rilru pawh a awm ang." Matthaia 6:20,21
'Tih tak meuhvin ka hrilh a che u, Heng ka unau te berte zinga mi pakhat chunga in tih chu ka chunga ti in ni,' tiin a la chhang ang. Mathaia 24:40
No comments:
Post a Comment