Dawt hi engvangin nge kan sawi ṭhin tih sawi dawn chuan a huam zau khawpin a rinawm. A tlangpui thu in Dawihzep vang te, chapo vang te, mahni inkhawngaih vang te, lan mawi tum vang te, duham vang te in Dawt hi kan sawi châwk a ni. Dawt hotupa chu Diabola a ni a, Thutak neitu “Ka rawn pian chhan chu Thutak hriattir hi a ni” ti tu chu Lal Isua a ni. Mi hi thutaka a awm phawt chuan hlauh tur a awm lova ‘Dawt sawi leh mi bum’ hi a hlau zawk ṭhin a ni.
Dawt sawi hi sawi laklawh/chin laklawh awl tak a ni, engemaw chhung atan mahni inhumhimna ṭha tak te pawh a ni a, min tih ven hawk chang te pawh a nei a ni. Sawi laklawh chuan kan inhumna thil diklo kan tih kha zawngchhang a awl hle bawk a, vawilehkhata sim har tak a ni.
Dawt sawi hian min chhanhim teh meuh emaw chu! Kan hlawk pui tak tak ṭhin em? Reilo te atan chuan min ti fihlimin, min ti hausa in, min chawimawi pawh a ni thei, amaherawh chu Dawt sawi nawmsakpui tak tak hi an awmin ka ring lo. Pathian huat zawng tak a ni a, an dawt sawi man hi a thungrul leh ṭhin. Kan Bible ah pawh Pathianin a huat zia kan hmu tam khawp mai, mahni ṭhenawm te tihder tu ngat phei chu a haw hle a, dawt a mi hek loh tur tih pawh thu sawm pek ah a awm a ni. Thupuan 21:8 ah phei chuan mei leh kâta kâng, thih hnihna tem tur te zing ah mi dawthei te hi an tel a ni.
Dawt kan sawi avanga kan him amaw kan tih hian kan lo him tawk lo, kha kan dawt sawi bawk kha phuah belha sawi nawn sek a ngai ṭhin. Dawt sawi hian chhantu a nei lova mahni in chhanhim nan dawt bawk sawi leh angai fo ṭhin. Thu dik erawh chuan chhantu leh ṭantu a nei a, mihring famkim lo leh sual thiltih theihna hmuna cheng kan ni tih hre tu Pathian hian dikna hi a ṭan thuai ṭhin.
Dawt sawi leh thu dik sawi chungchang hi naupan tet aṭanga nu leh pa ten kan fa te kan zirtir nasat a ṭul hle in ka hria. Thil diklo an tiha in humhimnana dawt min sawi khum aiin an thil diklo tih a nih ang taka min hrilh chu a huatthlala awm loh daih zawk in a rinawm. Fa ten vawikhat min bum tawh chuan min bum min bum tawh mai ṭhin a ni. Nu leh pa te hian kan fate hnen ah Dawt sawi pawi zia te, Pathianin a thungrul leh ṭhin a ni tih te, Dikna avanga tuar hi a huaisen thlak zawk zia leh rilru thlamuanna min thlen zawk zia te hi kan zirtir fo a ṭul a ni.
Fate ah dikna pawimawh zia kan sawi tam tawk lova, dawt sawi pawi zia pawh kan fah tam hek lo. Thil ṭha kan in zirtir loh chuan mihring hian sual kan âwn a, chu chu zir chawp ngai loin kan ṭhanlen pui ṭhin a ni. Dikna leh Dawt awmzia fah tamloh fa chu alo puitling a sumdawng a ni emaw sawrkar hna thawk ani emaw a hmachhawn ngai loh thlemna a hmachhawn a, dikna in a thinlung ah bu alo khuar ngheh tawk loh avangin eiruk(corruption) pawi tih lohna a inzir chhuak chawp ta ṭhin a ni.
Kan tu leh kan fa te dawt sawi bansan turin fuih tam ila, chu chu ṭhan len pui tir i tum ṭheuh ang u.
No comments:
Post a Comment