He mi hi ka rilru ah tunlai a cham ve reng avangin nizan ka mu thei lova, dar 2:00 a.m vela mut tum tawh chu dar 3:00 a.m vel ah tho tha lehin ziak turin ka computer ka han ON thar leh a, famkim lo takin ka rawn ziak ve e.
Trinity chu enge ni? Tri leh unity belhbawm thumal a ni a, Pathian pakhat GOD nihna sawina a ni. Tri = pathum (Pa, Fapa, Thlarau Thianghlim), Unity = Pakhat (Patian). Isua chu Pathian a ni, Pa chu Pathian a ni, Thlarau Thianghlim chu Pathian a ni. A Tri na chu Isua, Pa leh Thlarau Thianghlim a ni a a Unity na chu Pathian a ni. Pathian pathum a awm tihna nilovin Pathian sawina vek pathum a awm tihna a ni.
Pathian pakhat chauh a awm ti si chu chu engvanga sawi hran nge a tul? Ele, heng pathum te hi Pathian hnathawh dan hrang theuh thil tih in anglo vek a ni si a sawi hran loh chuan Pathian rorelna kan hmu in kawlkalh dawn a ni. Anih leh heng pathum te hi a awm hrang reng em? Awm hrang reng e, a awm hran avang hian Pathian rorelna chu kan hre fiah zawk a ni. Engtin? Pa chuan Pathian rorel hna a khaikhawma, Fapa chuan ngaihdamna(Chhandam tu), Thlarau Thianghlim chuan t.anpuina leh sual hriata thiamloh chantirna.
Chungte chu han sawi fiah deuh teh?
Pa leh Fapa leh Thlarau Thianghlim te hi pumkhat leh lak hran theih loh duhdan thuhmun vek, hnathawh dan in anglo anni. Pa hi Pathian rorelna kenkawhna a ni a, chu a rorelna hmanrua chu Thlarau Thianghlim a ni. Thlarau Thianghlim chu a nunga, thlarau chunga thunei tu a ni, a thianghlima bawlhlawh leh sual reng reng a ngaithei lo. Pathian thu nunna chu Thlarau Thianghlim a ni a, engkim a chhui chhuaka diklohna zawng zawng hailang tu leh thil diklo thiamloh chantirna tur te chhuichhuak tu a ni a Pathian rorelna leh dikna entirna/hriat theihna tha thei tawp a ni. Thil thalo reng reng a duh lova, bawlhlawh reng reng a pai thei lo.
Pathian chuan van ah vantirkoh(thlarau) Ama anpui in tam tak a dina, chung thlarau te chuan thianghlimna chiah an nunpui theihnan an chunga rorel turin Pathian atang chuan a duhzawng nung reng turin Thlarau Thianghlim alo awm a ni. Chu Thlarau Thianghlim chu an chung theuha nunga hnathawk theiin Pathianin a din a, sual reng reng kai lo leh bawlhhlawh kailo chuan a awmpui reng t.hin. Chu Thlarau Thianghlim chu sawi tawh
angin Pathian mize thatna tawp entirna nung renga awm anih avangin bawlhlawh reng reng a ngaithei lova, a sawi chhia leh a hnawl tu chu ngaihdam theih a ni lo, Pathian thatna tawp duhlo anih tawh avangin kawng dang a awm tawh lo.
Chu Thlarau Thianghlim duhdan nung renga chu sawi chhiaa hnawlin Lucifer a chuan amah leh Pathian thlarau siam hmun thum athena hmun 1 dawn lai chu thlemin a dodal pui ta a. An duhthlanna ngeiin chatuan atana Pathian ngaihdam theih lohvin an in barhlut ta a ni, chu ngaihdam theihlohna thu chu Pathianin Amah atanga Thlarau Thianghlim a tirhchhuah ruala Amah veka roreltura ding Pa thu chhuak awm sa a ni.
Anih leh Lucifer-a thlem thluk chatuana ngaidam thei lo tu chuan Lucifer-a thlem thluk tho mihring te hi engtinnge min ngaihdam theih bik tlat, chatuan atan ani ve lo em ni?
Pathian chuan thlarau chunga rorelna kenkawhnan a that theihna tawp hmuh theihna mi nung Thlarau Thianghlim a hmang kan tih tawh kha, mihring (thlarauva nung velo)te chung ah erawh chuan rorelna hran a hmang tlat mai. Chu roreltu chu A hmangaih theihna tawp hmuh theihna mi nung Fapa in a ni a rel thung ni, chu chu min din chhan a ni. Fapa chuan Thlarau Thianghlim angin thiamloh a chantir ve ngai lova, Pathian khawngaihna leh lainatnaa khat rorelna a ni. Lucifer-a Thlarau Thianghlim rorelna duh lova hnawl tu leh sawisel tu chuan amah leh vantirkohte ang bawka thlarau nei tisaa nung (mihring) te thlarau chu lam t.anga neih belh leh tumin a thlem thlu leh ta! Tisa(flesh)a nung nanana chuan thlarau ala hriatthiam loh avangin, mit varna leh Pathian ang nihna chu tisa taka ngaihtuahin alo duh ve ta mai a. An mit alo var a, Pathianin thlarau tisa neiin a siam ani tih an inhriat meuh chuan an zak ta a, mahni an in zahpui a Pathian ang an lo nihna chu chhia leh t.ha hriatna ah chiah alo ni si. Pathianin "In ei ni la la in in thi ang" a tih chu roreltu Pa rorelna ah chuan thi tlak mitthi an lo ni ta reng maia, Pa thinlung ah chuan an thi ta der mai.
Mahse mihring hi chhan neia Pathianin a siam a nih angin, a hmangaihna tawp lan tir theihna mi nung Fapa kal tlanga rorelna neih tur a ni bik tlat mai. Sual reng reng pu ve lo, Pathian hmangaihna hlang, ngaihdamna ringawt ngaihtuahtu Fapa Isua chuan a tuar theih leh theihloh chu mihring innghahna neih chhun a ni. Fapa chu lei ah lokalin Pa rorelnaa thiamloh chang zawng zawng, Pa rorelna in Thlarau Thianghlim hmanga thiamloh a chantir Pathian rama chan nei thei tawhlo tur uire te, tualthat te, hleprukna nei tawh denhlum tur te chu Pa rorelnaa thiam chang leh thei turin a rawn ngaidam ta hmiah hmiah mai. Heng sual te hi a t.awmpui tihna nilovin chatuana Pa lam hawi thei tawhlo te anni a, Pa lam an hawi leh theihna tura tuarsaka a hnungzuia Pa hnen hruai thleng turin a ngaidam a ni. Pa hmel hmuh leh theihna kawng chu a ni a "....Keimaha kal lo chu tumah Pa hnen an thleng ngai lo" a ti.
Fapa chuan Pa leh Thlarau Thianghlim duhdan a dodal ngai reng reng lova, Pathian nihna neisa, Thlarau Thianghlim leh Pa nihna tawmpuia lungawi sa a awm vek anni a. An duhdan taka kan tana Pa leh Thlarau Thianghlim ti lungawi leh tura ama tana hremna Dan siam nilo, a hmangaihte tana Pa leh Thlarau Thianghlim hmanga hremna Dan awm sa zawng zawng te chu zawh famkima Pathian(Pa, Fapa, TT) lungawina thlen famkim leh a tum anih chu (a tan nilo kan tan), "Mi tirtu duhzawng tih hi ka chaw tui ber a ni" a ti.
Chu tuarna ah chuan Fapa (Isua) chu a chianga setana pawhin Isua chu hneh theih anih a ring. Pa hneh tawh lova paih thlak leh Thlarau Thianghlimin chatuan atana thiamloh a chantir tawh hnu a ni tih in hre mahse Lucifer-a chuan Pa nilo, Thlarau Thianghlim nilo Fapa (Isua) tal chu hneh theih ala inringa vawi tam tak a thlem a ni. Mihring tana rorel tur Pathian(Isua) chu Pathian nihna a tawmpui thin Pa leh Thlarau Thianghlim thiltih theihna chuan an kalsan a tul chang a awm thin a, Setana hi kan tan min tlan nan a hneh ve a ngaih vang leh kan tan thiamloh a chantir chu alo kal chhan a nih si vangin, "Ka pa, ka pa engatinge min kalsan" tiin a rum a ni.
Pa rorelna in Thlarau thianghlim hmanga thiamloh min chantirna No chu in a hreh em avangin "Ka Pa, rem i tih chuan he no hi ka hnen ata la sawn rawh; nimahse keia thu ni lovin, nangma thu thu ni zawk rawh se" a ti ve ngawih ngawih a ni. Setana avanga thlan thisen anga far neih chu Pa leh Thlarau Thianghlim rorelna chuan a duhlo khawp ang, Hmangaihnaa din Pathian Isua chuan nang leh kei atan nasa taka ngenin tlawm thlak ti hle mahse Roreltu Pa hnen ah lak sawn duh em em si khan a thu ah a in nghat ta a ni.
Thi khawp hiala thu zawmin, tih that famkima lo awmin kan tan a tuar chhuak ta. Pathian (Pa, Fapa, TT) nena kan inremna chu Amahah chuan nghaha lo awmin a rinchhan apiang te chu Pa leh Thlarau Thianghlim pawhin thiamloh a chantir thei ta lo. Isua ah chuan mi zawng zawng chhandama lo awmin, ngaihdam loh mihring piang reng reng an awm lo. Kross ah chuan sualna awm thei zawng zawng leh lola awm tur tlengin khenbeh in a awm, Fapa hmangaihna chuan ka hnehta "A kin ta" tiin a thlarau a thlah ta a. Chu kan inrem lehna thuthlung hriatrengna tur chu sacrament(a thisen leh a taksa tuarna hriatrengna) hmangin saui min tan sak ta a ni.
Chu hnehna ah chuan Pathian nihna/rorelna zawng zawng(Pa, Fapa, TT) chu a lungawi tawh a ni tih thu hi ram tinah hrila, lungawina kim vek hmutu Pa leh Fapa leh Thlarau Thianghlim hminga Baptist turin min tir a ni. Pa dinglama a han thut hnu chuan kan tana tanpui turin Pathian thatna famkim leh thiltih theihnaa hna thawk tu Thlarau Thianghlim chu a duh apiangte tana sawm leh koh theihin Penticos ni ah chuan Fapa chuan min rawn tirh sak ta a ni.
Isua chu sual tiboral tura lokal a nilova, Pa duhzawng leh Thlarau Thianghlim rorelna chanchin hril chunga min ngaidam tura lokal anih avangin he khawvel ah hian sualna a tiboral lova. Mahse chu sual zia chu Lucifera te thiamloh chantir tu Thlarau Thianghlim bawlhlawh ngaitheilova chuan a ti thei t.hak si lo, kan zingah chen reng duh thin mahse chu sual avang chuan kan ti vui theia chuvangin "Thlarau Thianghlim chu ti vui suh u" tiin Pathian thu chuan min chah.
Isua chuan kan tan tuarin, kan sualna zawng zawng phurin min ngaidam tawha. Keini en lova Isua en tu Pa Pathian chu Isua tuarnaah lungawi tawh mahse Pa rorelna chuan mihring te hi engtiklaimahin thianghlim leh fel a ti ngai dawn lova, kan felna lai ber pawh pawnchhe hnangkhai leh pan bawmkhak luk in ni e ti tu hian ro ala rel leh dawn a. Isua chu he khawvel ah lokal leh in a beram te chu a rawn hruai anga, Pa hnenah mihring bawlhlawh te chu Amah an tana a thihna leh thawhlehna an tawmpui ve avangin an ai Pa hmaah a din sak anga, pawnchhe hnangkhai leh panchhe bawmkhah lûk ang mihring te t.an nan chuan a kut, a ke leh nâk a ser chu a hmuh tir ang. "Tupawh mi hmaa mi tan apiang chu ka Pa vana mi hmaah ka tan ve ang" a tih kha. Chu Isua lo kal lehna tur chu Amah (Fapa) hnenah pawh hriattir in a awm lova roreltu Pa chauh lo chuan a hre lo a ni. Fapa chuan a zawmpui Pa leh Thlarau Thianghlim duhdan a hriat chian angin alo kal leh dawna thil thleng tur chu a sawi lawk thei a, a hun leh ni erawh Pa thu thu a ni a ti.
Aigupta saltang chhuak tawh(Isua tlan tawh) Israel fa te ni mah ila kan kawngka bianga Beramno thisen kan tah loh chuan, mi tha tumah an awm hrelo tu Pathian (Pa) chuan tlan tawh/saltang chhuak kan nih leh nih loh lam a en ve dawn lova, en tlak kan awmloh avangin Beramno thisen kai chu a kalhlen tawp anga, a kailo erawh chu a suat hmiah hmiah mai dawn a ni. Rorelna chu Pa leh Fapa leh Thlarau Thianglim duhdan a rel a ni dawn a ni. Fapa tan apiang te chu Thlarau Thianglim awmpui anni anga, chu chu Pa in thiam a chantir ang.
