Mumbai ka va ngai dawn che em!

Kum 2009 khan Mumbai ah hian tum lawk lo deuhvin lehkha zir turin ka chhuk thla ve a, a tir chuan Delhi lama zir tum hmasa ka ni a, application form submit hma zan ah chiah midang ka rawnna anga ka tumna chu thlak lehin Mumbai lamah zir turin ka inbuatsaih ve ta zawk a ni.

Kan zirna hmun IIT Bombay hi Powai lake kamhrula awm a ni a, thingkung atamin boruak pawh campus pawnlam aichuan a dai deuh a ni. Area a zau in kawng peng neuh neuh leh building a chhungah a tam avangin ka bel har hle a.

Main gate aṭanga luh chiah hian he kawngpui hi kan zawh ṭana, thingkung an humhalh ṭha hle a ni tih a hriat nghal a ni.

Entrance road. (Fur laia lak a ni)

Ka hostel awmna building hmasa ah chuan student kan tam em avangin a tir chuan lehkha zir mood ah pawh ka cheng lawk thei lova.
Ka awmna hmasa Hostel 3 chu

Holi lai a ni

Hostel 3 ah hian room 1 ah pahnih zel kan awm a, ka vannei asiamin ka roommate tur alo kal lo hlauha mahniin ka awm tluan ta a ni. Mahse zanah thawm a bengchheng rei thei hle a ka hne viau ṭhin a ni. Kum 1 ka awm hnu chuan sak thar Hostel 14 ah min sawn a. A awmna hmun hi a fal bawk a, a nuam hle. Mahse class panna kawng Hostel dang aiin a thui ber thung  a ni 

Fei sen a inkawhna lai hi ka room awmna a ni

 

 

Ka room chung aṭanga Powai lake leh Hiranandani area lan dan

Mumbai ah hian Mizo te hi kan awm darh angreng hle a, a bikin kan awmna Powai bulhnai ah hi chuan zirna in dang a awm lo hle a, chuvangin Mizo awm zing ah pawh a hla pawl ah kan awm a ni. Inkhawmna kawng te a hla in sum sen a tam tham ṭhin avangin ka awm tirh chuan ka lang tam lo hle a. Chu aimah chuan kan zir dan phung leh hun hman dan te alo danglam tak avangin leh insiamrem nan hun ka duh rei avangin ka chhuak tam lo hle a ni.
Mumbai Mizo Association ah chuan ka hun tawp dawn lamah ka in hmang ve nasa ta hle a, ṭhian ṭha tak tak te Pathianin min pe zui a. Zaipawl leh male voice te nei ṭhin in hmun hrang hrang ah hla remin kan kalkual ṭhin a, Christmas pawh hlim takin kan hmang hova, kan inluangrualna hi entawk tlak leh chhuanawm tak niin ka hria.

2011 BMCF Male voice

2011 Kumtawp a huhova hmang te

IIT ṭhiante

Mumbaia ka ṭhian zawng zawng te, ka room te leh ka zirna hmun zawng zawng te, ka sulhnu te nakinah chuan ka la ngai hlawm dawn ngei mai.
He hmuna ka awm chhung hian ka nuna chhinchhiah tlak thil tam tak ka zir a, ka zirlai mai piahlamah nunphung te, rinna thleng pawhin hlawkna ka tel nasa hle in ka hria a chuvangin ka lawm em em a ni. 

Thank you, Lord, for all the experiences that you gave me these past years.
Thank you for the success that will always be happy memories for me.
Thank you for the failures that molded me to be stronger
and drove me to come closer to you.

Thank you for all the special friend you gave me in my life.
Thank you for all the happiness that gave me time to celebrate.
Thank you for all the sadness that reminded me of my weaknesses
and made me realized that I really need you.
Forgive me, Lord, for all my shortcomings.
Forgive me for all the chances that I failed to take
and for all the opportunities that I missed these years.
Thank you LORD

Zan dangdai tak a ni!

Chhun lam ah ka lo chhin sek avangin ni zan chu ka mu hlei thei lova, tih tur engmah a awm loh avangin computer games te ka khel kual vel mai maia. Zing 2:30 a rik chuan mut mai ka han tum a, ka harh tulh tulh zawk emaw tih turin khum ah chuan ka let a ka let a. Reilo te ah ka tho leh ta nge nge a, computer chu ka han on ṭha leh a. Internet connect in ni danga ka tih fo tawh angin facebook leh misual.com te ka han lut leh phawt a, mahse tunlai chu ka eng tihmah a tui lo a niang post chhiar thuak bak ka peih lova.

Kan veng in chanchin kan in hriat tawnna tura website an siam chu kan han tlawh ve leh a, ka hmel hriat ka awm bo hnu a boral an lo awmnual tawh maia, ṭhenkhat pheichu ka hriat chian em em te an ni a, an chanchin te chiang zawkin ka chhiar zel a. A ṭhen chu hausa deuh te an ni a, a ṭhen chu rethei deuh te, lehkha thiam deuh te, Doctor te, dawrkai te, zirlai te, kum in ang lo tak tak an ni hlawm a.

Mahse tunah chuan an nihna thuhmun vek mai chu ‘An awm tawh lo vek’ a ni. Ka rilru chuan ‘Ka awm tawhloh huna he khawvela hriat reng ka nih tawh bikloh tur thu te min ngaihtuah tir a,’ kan Pathian thu in “Mikhual leh cham mai kan ni” a tih te chu dik ka ti tulh tulh a, Solomona’n “Kan dam chhûng ni zawng zawng hi thim hnuaia khawsain bawrhsâwm mangang leh thinrim ṭeuhvin kan hmang ral ṭhîn,” a tih te chu ka hun kal ta te nen ka chhui zui a, nun alo hriat zia te chu ka pawh telh telh in ka hria a.

Chumi ngaihtuah chung chuan post hlui leh thlalak te chu ka han en phei zel a, kan veng ṭhalai ho hlim lai ni thlalak leh thu te ka chhiar a. Kum 3 lai liamta a ka bialnu hlui thlalak ka hmu teh nawlh maia , kan inkawp lai te ka ngaihtuaha chhunzawm a, tun hnu a ka rilru lo inthlak dan chu chuan min hriatchhuah tir a. A ni hian ka nun min thlak danglam nasa hle a, ṭha leh fel ni a ka inhriatna zawng zawng te min pheh thlak sak ni ber in ka hria. Nula fel tak a ni hran lova, mahse ka rilru a tih hahna lamah ka khaw hawi erawh a ti danglam nasa hle a ni.

Computer chu ka Shut down leh a, tichuan inchung zawl ah ka han chhova, dar 3:00 a pel tawh a, tumah an awm lova a reh ruih mai, nizan lama thla bial pawhin kawl lam a hnaih tawh hle a, thli lah chu a thaw nasa hle maia. Inchung zawla ṭhutthleng awm ah chuan ka han ṭhu a, ka thil ngaihtuah chu ka chhunzawm leh a. Phaia ka chhuk hmaa mahni tawka fel ka lo intih ve ṭhin dan te, kohhran inkhawma ka ṭhahnem ngaih ve ṭhin zia leh kohhran ṭhalai tana ṭhahnemngai taka chhun leh zana ka lo thawh ṭhin te, Upa ten hmaichhan ngeia min fakna aw mawi te, kan in ah ka thawhpui Evangelism sub-committee ten missionary chhuak tur anga ṭhahnem ngai taka rawngbawl zui tura min thlahna te chu ka mitthla leh beng ah hian a rawn ri nawn leh a.

A lunglenthlak rualin “Engtinnge kha tihlai khan sim tur lian tak ka neih hi a lo inthup reng le?” tih ka ngaihtuah tel bawk a. Nie, Davida pawhin rei tak Pathian ring em em chunga a harsatna zawng zawng a sual chhuak tawh emaw a tih hnu a a sual inthup rapthlak tak mai alo lang chhuak chiah(Sam 51) ang kha ka in chan ber in ka hria.

Kohhrana ṭhalaia ka rawngbawlpui ten min thlah zan chuan ka ngaihzawng nen pawh chuan kan inthlah ve a, (a ni nena kan chanchin hi zep tel zauh bawk ila). Rinawm taka a awm ka duh a, ka mizia a hria a min ring tih pawh ka hria. Nimahsela ka chhukthlak aṭang chuan hel zai a pu ta mai a, a tir chuan a duh chuan ṭhen mai pawh ka pawi ti bik lova. “Pathianin ṭul a tih dan dan ni rawh se, ka tana hnawk tur anih chuan a nin min ṭhen sak zawk se, ka tana ṭha tur anih chuan min ṭhen tir lovang chu” ka ti ve a.

Hemi kum hian “Dam chhung mi hmuak apiang i tirh nise lawm takin ka pawm zel ang” tih thupui ka lo ṭan chhan ve a (fel amaw ka intih lai pawh a ni). Chu thupui chu nghet taka vawn ka tum tlat a, chuvang pawh chu a ni ka ṭhiannu pawh chu min hmuak tu zing ah chhiarin he thupui ṭan chhan hian Pathian hmangaihna behchhan tumin ka lo pawm nghet a. Chung chu ka hrilh chuang lova, a awm dan apiang ah hriatthiam ka tum zawk a.

(Kan in kar chu sawi hmasa ila…..)Ani hian ka thupui hmang chuan mi vaw let nasa khawp mai, lehkha lam a ti thei vak bik lova, engemaw nikhua a in ve thei mai a ni tih ka ṭhian pakhat sawi pawh chu a tak in ka tawng a ka ṭhen phah chuang lo, a sual vang a ni lo tih ka hre chiang a ni. . (Ka in fak hmasak avang khian khirh turah min lo ngai lo ula, ani pawhin chutiang chuan min ngai lo, fiamthu duh leh rilru zau tak ka ni…. hairehai ) Keima mihring duhthlanna ah chuan ka dream girl a nilo, mahse ka nun a hria a, a fellohna ah infuih tawna insiam ṭhat a duh tih ka hriatna chu ka tluklo zawkmah in ka hria.

Eng pawh nise keia tawn tura Pathian ruat a nih chuan atan pawh a ṭha anga ka tan pawh a ṭhat ngei ka beisei a Pathian kut ah ka nghat a, “Pathianin kei mifel lo pawh min hmangaih thei ni a ka hriat chuan chu chu ka zir ve tur a lawm,” tiin ka rilru ka ti paukhauh a, atan vawi tam tak ka ṭawngṭai a. Grape wine lar vak lai khan tlema rui deuh hlek chunga min biak chang a awm a, kan inbiak zawh ah ka ṭawngṭai sak mai a.

(Zu hrim hrim pawh hi kei chuan sual ka ti lova , mahse Mizo chu kan a em a a nun a tih khawloh lohna tur zawkin ka dil sak ṭhin). Fel lo ka tihna aiin hmana ruihhlo bawiha ka tang Lalpan min chhanchhuahna chu ka thinlung ah a lian zawk a, chumi hriatchhuahna avang tak pawh chuan ka lawm a, Pathianin min hmangaihna ang taka hmangaih let ve ka tum tlat zawk a. A ṭhat phah na tur a nih phawt chuan ka hamṭhatna pawh chan ka huam ve a ni. (Love strory ang pawhin sawi tur a awm nual ang)

Mahse kan in buaipui na lamah a ni telin ka chaklo ta zawk a, ka zirlai awlsam taka ka ngaih ṭhin ah pawh chuan ka ti chhe chho ta zel a, ka ṭhiannu chuan chung chu engmah a hre ve lo. Chhuanlam mumal pawh nei lovin min ṭhen a(inhmu lo reng inngaizawng chu a tuarzuau zawk in hre mai ang chu) a thiamloh a ni hran love. Ka beisei aiin ka na ta zawk a, Pathian hnenah vawi tam tak ka ṭawngṭaia, ka harsatna hrethiam tumah an awm lo. Kohhran leh khawtlangin an fak em em chuan report pek ngamloh khawpin ka lo ti chhe ta a, haw chhoh pawh ka zak a.

Chu nun kawng hnih(Pathian ka rin chhannaa) ka hlawhchhamna chuan a chang chuan ka rilru a ti bei dawng leh ṭhin a, thih daih mai te min chak tir a. Pathiana aw hriatloh avanga lungawi loh hi alo na ngei mai, mahse beidawn ka tum hauh lo. A  thil tuar ah Pathian a ngawih reng avanga Joba’n “Mi ti hlum hial mahse amah chu ka nghak cheuvang” a tih kha ka hre chhuak a, he ka harsatna su kiang tur hian a tira ka in nghahna chu vawn tlang tumin ka rilru ka ti paukhauh a, kum 1 lai hlawhchhamna tawng mah ila Lalpa ka rin hi a dik a nih chuan a siam ṭha leh thei ang tih rinna nen.

Ka ṭhiannu min ṭhen chuan amah dem aiin Pathian ah he zawhna hi ka nei lian ta zawk a, “Lalpa enge ka tan hlawkna awm? Ka innghahna thu te, ka ṭawngṭaina te kha i ngaithla lovemni?” ka ti a, Pathian a ngawih reng avang chuan angaihna hriatlohna chuan min vaw chau hle a. Pathian hmangaihna te ka rinhlelh rum rum chang a lo awm a, Pathiana vui te thu khaw chang leh ka vuina hi a inmil em tihte hriat tumin Pathian lo bel tawh ṭhin tlu leh te nun ka phak tawk tawk in ka chhui let a. Pathian duh lova Setana be tute rindan te pawh ka chhiar fova. Pathian la hre lo te nilovin Pathian hre tawh ten an rinloh chhan hi hriat ka duh a ni.

Khawlai ka len te chuan Pathian hmangaihna dik leh diklo ringawt fiah tumna chuan ka rilru a luah a, rethei leh kutdawh, piangsual ka ṭanpui mamawh em em a an kut lo phar te chuan ka mittui an tih tlak rualin ka thinlung ah zawhna an siam nasa ting maia, “Engatinge ka hnen ah mamawh min dil, Lalpan engkim a neia ngate a pek loh che u, kutdawh turin engatinge in lo pian? Amah in hriat loh chuan in tawpna tur pawh hremhmun a ni lehnghal, tehna thuhmuna rorelna kan hmachhawn tlang a nih ngat chuan in va piang vanduai bik tehlul em!” tih ngaihtuahna te chuan kar tam tak ka thinlung a luaha, ka vel a mite hnena ka sawi chhuah pawhin ka rilru an hre thiam lo.

Rethei ka intihna avang chuan rethei zawkte chan ka ngaihtuaha, ka lungawi phah chuang lo, “Kei aia rethei an awm avang hian enge ka lungawi ang! An ni retheih rinchhana lungawi chu a sual thlak ka ti a ni.” Lalpan engkim a nei a, engkim chunga roreltu leh thunei tu a ni, engkim min tih sak lo mahse a ropuina nen ka dawn hian “Engtinnge a fate dinhmun inthlau em em a awm hi a en reng theih ang le? Fa nei ila hetiang hian an dinhmun inthlau se hrehawm ka va ti dawn em!” tih ka ngaihtuah a.

A ṭhenin duhtawk aliam an hmuh laiin a ṭhen kan hriatlohvin hnawmhnawk karah an cher hlum a, kan pianna tur hi tumahin kan thlan a ni bik si lo. Vanduai bik an awm emni ang? “Vanduai bik reng kan awmlo Lalpa remruatna ah” tih hla te kan sa a, Petera’n “Pathianin mi duhsak bik a nei lo tih chiang takin ka hria e” a ti bawk si a, chuvangin a ṭhen pawh kan hre lo a ni he luikam aṭang hian tih ka hria.

Pathian a ngawih reng avang chuan hrehawm a ti lo tihna em ni ang? Hausa takin a lalṭhutthleng ah a ṭhu ngawi veng veng mai em ni ang? Chumi ka ngaihtuah chuan Lal Isua ka rilru ah lo langa, hei hi amah ka rinna chhan pawh a ni, khawvela a lokal dan hian ka buaina a ti fiah em em. Isua ka hriat avang hian ka lawm em em a ni, ni suh sela kan Bible pawh hi ka ring kher lovang, khing ka zawhna te pawh khi Isua hriatna lo chuan Pathian awm rinloh puina tham a ni he ka thinlunga zawhna te nen hian. Isuan rethei taka a tawrhna hian Pathian thinlung nat zia min rin tir a, Isua Pathiana ka pawmna ah hian Pathianin a lalṭhutthleng kalsana rethei taka alo kal hian min ngaihtuah takzet zia min fiah sak bawk a, rethei te a ngaihtuah zia amah ngeiin a takin a rawn fiah a ni si.

Tichuan zing dar 5:00 chu alo ri dawn ta maia, he zan/zing danglam tak ah hian hei hi ka inhmuhchhuahna chu a ni, Rinna lovin Pathian hi keima ṭhahnemngaihna in ka lo zui ve ngat ngat a, Pathian rinhlelhna fiahna dawng ngai lovin mifel nih ka lo hlawh fova, Pathian thu pawh sawi tur ka hria in ka duh ṭhin, mi dang pawh siamṭhat theih ka inbeiseia. Chu chuan chapona huang ah min lo chen tir reng a, ka hriatthiamloh harsatna ka tawh ni chuan ka rilru alo kha ngei mai. Mihringin ṭha leh fel a tih anga Pathianin a tih ve loh tur zia pawh ka man thiam ta a.

Lalpa rorelna hmaa kan din huna mak kan tih tura hrehmuna nawr liam tak, rawngbawl tute awm ve tur pawh mak ti lo sawt turin ka rinna pawhin hma a sawn in ka hria. Chung zawng zawng ngaihtuah tura rilru hah a ka awmna ah chuan ka lawm a, ka ṭhiannu hmanga ka ngaihtuah theih phah avang pawh chuan ka lawm a, beidawng amaw ka intihna chu amah avanga chuan alo puitling ta zawk a ni.

“Tu a ni nge, hriatna lova thurawn thup botu hi?’ Chuvang alawm ka hriat thiam lohte, Ka tana mak lutuk, ka hriat loh thilte ka sawi ni……….Benga hriatna mai zawngin ka hre tawh chia, Mahse, tunah zawng ka hmu ta che; Chuvang tak chuan ka inten a, Vut leh vaivuta thuin ka sim ta e” Joba’n a lo tih awmzia te hi hnai takah a ni ang hian hma chhawn lo mah ila a sawina awm ang thinlung chu darthlalang ah ka hmu ve ruai ruai in ka hria a ni. Joba pawhin sim tur a neihzia a hre mai nilovin a in ten a, a sim ta. Eng chu maw a sim?

Sual inthup hi kan pai fur a ni, Davida pawhin a hmu har khawp mai. Chu kan sual inthup chu a lo lan chhuah chuan kan rilru hi kha fek fek tak ni. Pathianin a haichhuah loh avanga mi ṭha anga leng hi kan tam em em, fak kai nazawng hi an lo fak tlak kher lo, Pathianin a tih mualpho zet loh chuan kan sual hi a awm reng ṭhin. Chuvangin “A chhuang apiangin LALPA chu chhuang rawh se” (I Kor. 1:31)

Tichuan ka khum lam panin in chung aṭang chuan zing khaw en hma in ka chhuk thla ta a. Heng ka rilru a awm te hi ka theihnghilh mai lohnan ziak chhuak ve reng reng teh ang tiin kim lo takin ka ziak ta, nangnin in lo chhiar ta a. Engtin nge in rilru ah a thawh ang tih lam chu ka hre lo, mahse in chhiar ve reng reng avangin ka lawm .

Eden Bawhchhiatna “SEX a ni lo, THUPEK bawhchhiatna a ni”

(A thu a luh hma in ‘Thupek’ hi a sap tawng chuan ‘Order’ a ni a, ‘Law (Dan)’ nen a in anglo a ni tih kan hriat hran vek ka beisei)

Awle, a hmasa berin Eden huan bawhchhiatna hi Pathian Thupek zawm lohvah a ni. Evi leh Adama kha vawiin ni a kan hriat phak baka thil ti thei leh chak taka Pathian siam anni, thil nung zawng zawng chung ah thu an nei a ni (Gen 1:26). Adama hnen ah Pathianin ramsa zawng zawng a ko khawm a an hming alo phuah sak diat diat a ni tih pawh kan hmu, chu ti khawpa Pathian nen inkawmngeih a lengdun thin anni ni tih pawh kan hria(Gen 1:19).

Pathian thupek bawhchhe lo in awm ni sela Adama hi Isua ang chiaha thil ti thei a ni, Isua Pathian fapa tih a ni angbawkin Adama pa chu Pathian a ni tih a ni bawk(Mat 3:38). Isua pawh Adama hnuhnung tih hming vuah a nih kha (Isua kha Adama bawhchhiat hma angin, la bawhchhe lo anga lokal a ni tihna a ni. Chu chu Adama bawhchhiat tlan lehnan angai a ni).

Bible-a kan hmuh dan ang chuan Pathian khan thei an ei lai kha a hre miahlo niin alang (Gen 3:11). Chuti a nih chuan Pathian khan a ring a, a thilsiam ah khan full authority a pe tawp tihna pawh a ni thei ang, a hriat miahloh thil an ti thei tlat. Thei an ei leh ei loh hriatnan erawh ‘Amah Hlauhna leh Sakruak anga inhriata Zahna’ a hnutchhiah thung a ni, an biru a an zaka “Ei loh tûr ka tih thei kha i lo ei a ni maw?” a ti ta chiah a ni.

Saruak an nih khan Setana hmaah an zah kan hre lova, Setana an hlauh kan hre hek lo, Pathian hmaah chiah a ni. Chuvangin Pathianin kha thei an ei hriatnan khan Amah nen chauh relation alo insiam reng a ni thei ang. Amah an zah tih a hriat avangin Amah vek in an serh khuhna tur Savun puan a siam sak a ni (Gen 3:21). (Setana hmaa in hmu khawm te hi chu kan zak lem lova, amah kan hnaih chuan kan in hak te theih em hi maw). 

Khati khawpa thil ti thei leh chaknaa thuam ni reng chunga Adama’n a thu a zawm ta lo kha a ni Pathianin a huat ber mai chu (Chutiang bawkin thil tithei tak ni chunga Isua in thuawih taka a tuarna kha a lawmna a ni ve leh em em thung a ni). An thupek zawm lohna avanga an thei ei kha thei tuihnai leh ei chakawm ngawih ngawih a nih vanga ei chak ta an nilo, a thei hrim hrim kha a pawimawh ber a ni lova a thupek a kha a pawimawh ber zawk chu a ni.

Thei ai ah hnah thel pawh nise, bawng ek khawro pawh nise, “tawk suh u” tih thupek a awm chuan thei ei nen a hlauhawm dan a thuhmun reng zawk a ni. Khawvel chhunga nunna nei zawng zawng chunga thuneitu an ni a, misual an ni lova, thil zawng zawng, chhiar sen loh chunga thuneihna a pek kara thil pakhat lek tih phal lohva Pathianin a dah ve kha Pathian ngaih ah chuan zawm harsa lo tak a ni a.

Pathianin a rilru chhiat avanga he thu hi pe pawh a ni lova, an thuneihna zawng zawng chhung ah a chen ve theihnan Sawma pakhat a chang ve mai chauh a ni zawk(an tih theih en chuan 10 a 1 pawh a tling lovang). Hei hi tun thleng pawha Pathian zia a ni, Eden huana a tih ang tho hi Amah ringtute chung ah pawh ala ti reng.

Evi’n kha thei ei a châkna chhan em em pawh kha a tui hmel vang nilovin a thlemtu thu anga awm theih a châk em vang zawk a ni. Kha thei an ei avang khan Pathianin a thinur a ni lova, a thu an zawmlohna zawk tak kha a huat chu a ni. Thei chu an ei a, sual an lo ni a, Pathian hawisan an lo ni a, an thlah te thleng pawha hrem hmabak leh suala chhiar vek an lo ni ta a.

.
Chu chu thei ei avang ngawta thleng ah chuan hmehbel harsa kan ti ta em ni?Thupek mai nilovin Sex a ni zawk ang kan la tih talh ni! Samsona chung ah pawh hetiang chiah thupek hi a thleng tawh. Samsona chu chak tak leh thil ti thei tak, rapthlak khawpa chakin Pathianin a thuam a ni. A chakna vawng reng turin thupek a hmu ve tlat mai, “a lu a ziat kawlh tur a ni lo” tih a ni(Roreltu. 13:4).

A sam ah khan a muscle zawng zawng ti strong turin danglam bik takin DNA eng ilo a uai thla a ni lo, meh kawn ringawt kha a chaklohna pawh a ni hek lo(Biologically pawhin a ni thei lo hrim hrim). Sual kan pai chhan hi ‘DNA corrupt vang a ni‘ an tih ang bawka sawiin Samsona chakna bo chhan kha ‘DNA lost’ nih tir kan tum leh hram dawn em ni, Engvangin nge a chakna kha a hloh?

Met lo tura thupek a nihna tak kha a ni a chakna in nghahna zawk chu. A sam meh a nih tak chiah ah chuan Pathian thupek hawisan alo ni a, kar lovah a chakna zawng zawng pawh lak bo sak a ni ta vek zawk a ni. Chu chu a pian hmaa thupek awm sa anih vang a ni. A sam ah chakna awm lo, thupek ah a ni a awm ni.

.
Filistia ho pathian Dagona hma ah an hruai a, chumi tum chuan Pathian hnenah tlawm takin a inhlan leh a ni. Chakna nei leh turin a sam a zuah sei leh pawh a ni lova, Pathianin a rawn ti to leh te te pawh a ni hek lo, lu kawng chungin a dam laia a tihhlum aia tam zet a tihlum leh thei zawk a nih kha. Chu chu engvang nge? Pathian ah ngaihdamna a dil a, Pathianin a khawngaiha chakna a rawn pe leh zawk a ni mai. A sam kha a pawimawh ber  a ni lova, Pathian thinlung a tih natna tak kha a ni a chakna a bo chhan leh a tawngtainaa alo neih lehna zawk chu.

.
Chutiang bawkin Evi leh Adam pawh khan thei an ei tak kha Pathian lungnihlohna nilovin thupek awm hmasa zawmlohna zawk a nih bawhchhiatna in tanna chu. Thei ah khan engemaw sual inthlahpunna a awm bik a ni chuang hek lo. An thei ei kha paih leh turin inkawm luak leh mahsela awmzia a awm chuang lovang, thupek in tanna kha thei ei a digest ringawt pawh a nilo, ei hma hauh atang “tawh pawh in tawk tur a ni lo” tih a ni zawk. Samsona khan arbawm tiatin a sam pawh zuah leh mahse a chak phah tawh chuang lovang tih ang a ni.

.
Thenkhat chuan thei ei avanga an thlah zel te suala chhiar kan nih tak hi an hre thiam lova, “Thei ei ringawt a nilovang, Serpent nen sex an hmang anga DNA corrupt vang zawk aniang” an ti. Thei kha ngaihpawimawh phet an tuma, ni theia an hriatloh avangin he thil hi an hmehbel ta zawk a ni.

Thei kha a pawimawh em avanga he sualna hi inherit kan nilova thupek awmsa diam tawh kha Pathianin a ngaihpawimawh em avang zawkin, khati khawpa thil ti theia a siam Adama chungah khan a thin a ur a, thil ti sual ve hauh lo, a thuhnuaia a dah zawng zawng tenen lam an chungah a kut a lek ta a ni zawk. (Hei hi thupek zawmloh a ni a Dan thu vang a ni lo.

Dan thu hi chu sual avang chauha lo awm a ni, thenkhat in Dan anga an ngaihtuah thin vang bawk a ni hrem nilo tur hrem tela an hriat. Dan leh thupek hi a in ang lo, lal Saula hnawl anihna kha Dan thu nilovin Pathian thupek zawmloh vang a ni. Dan in a phut anga Pathian tihlawmna ah chuan a rawn hawn thau tha hlawm lutuk, Samsona lu meh phal lohna kha Dan thu a ni lova, Pathian thupek (order) a ni. heichu remchanga sawi nise kan kual thui dawn tlat) Samsona sam kha a pawimawh em avangin an meh kawn khan a chak talo a ni lova, thupek a pawimawh em avang zawka chak lo a ni.

.
Pa tilungawi leh tur chuan thu bawk alo ngaia, lukawlh chungin Samsona pawhin Pathian a ti lawma a chak leh ta a ni. Chutiang bawkin sual taksa pu chung hian Pathian kan tih lawm leh chuan Adama chakna leh thiltihtheihna ang kha nei leh turin Isua chuan Pathian thupek, batna lehkhaa in ziak(Dan avanga sual nih in hriatna satliah mai nilo) chu min rawn tuar sak ta a. Thlemna hnehloh avanga Lu meh kawlh tawh ni chung hian Isua hnung zui chu kan chhandam nan kan pawm chuan kan lo chak leh anga, chu chu piangthar chu a ni.

Kan bawhchhiatna avangin kan lu(kan ropuina) mehkawlh a ni a, kan mit pawh kher a ni tawh. Chuvangin he khawvel ah hi chuan Adama hmasa ang khan kan awm thei tawh lo, Adama hnuhnung kan ngai ta a, mitdel chunga min kaihruai leh min ti chak turin Isua chu kan tan alo in pe a ni zawk. Sex lam a ni lo Thupek zawmloh avanga mit var duh kha mitmu kherchhuah sak kan ni zawk a nih hi.

Krista in chhandamna a rawn thawh khan mit thar min pe lova, mitdel te kawng min kawh hmuha Ama mit min rin tir a, chatuan rama kan luh lehna turin a kawrfual hmawra deka, thlah lova kan zui a ngai a ni zawk. Chuvang chuan a lawm “Awm hle hle tawh rawh u” ti lovin, “Keimah hi kawng leh thu tak leh nunna chu ka ni, Keimaha kal lo chu tumah Pa hnen an thleng ngai lo” a la tih ni.